燒肉慶祝必到

呢個月係朋友生日佢話想食燒肉慶祝，之前見過呢間本佐都唔錯於是就決定係呢間。

預先book定枱，星期一至四夜晚$278，加$40就可以任飲。

我地先叫左刺身，有北寄貝、三文魚、甜蝦、玉子、帶子同松葉蟹棒。

三文魚同甜蝦都好鮮甜，都叫左幾次，其他都正常，款式都算多。

嚟到主角燒肉，都叫咗幾款試吓。最鐘意係熊本一口和牛，極上牛小排同安格斯極上牛仔骨，牛味濃又唔會鞋，肉質啱啱好。另外都叫咗啲五花肉，都唔錯。

海鮮既大蝦幾新鮮，肉質唔會霉，仲好彈牙。牛油燒日本元貝，幾香牛油味，元貝都唔算大意想不到。

蔬菜就叫左翠玉瓜同牛油金菇，牛油金菇分量多同好重牛油味超好食，叫左3次。糖心菠蘿自己燒，燒完有啲似平時放題食嗰啲都唔錯。仲有啲炸物，叫咗香芋丸，一口甜薯，仲有幾特別既炸雙皮奶。炸雙皮奶幾重奶味又滑，都推介。

呢度仲有啲壽司可以叫，我地叫左火炙和牛西冷壽司，三文魚子軍艦，蟹子軍艦。三文魚子軍艦有驚喜，分量俾足竟然冇用青瓜裝飾，呢點抵讚。和牛西冷壽司都好食唔係求其貨。

另外值得一讚係呢度唔收切餅費，因為系同朋友慶祝生日所以自備蛋糕去，仲主動同你拎蛋糕雪住先，唔錯！成餐飯都好滿足。